End of an era

Á sunnudaginn vann ég síðustu vaktina mína í World Class í bili, eftir tæplega þriggja ára blóð svita og tár þar. Mikið er ég glöð að vera hætt, allavega í bili, en ég er samt ennþá glaðari yfir að hafa tekið þessarri vinnu þegar mér bauðst hún á msn um árið (takk Hrefna :*). Þetta hús og fólkið í því er orðið svo stór hluti af rútínunni minni að ég get ekki ímyndað mér hvernig líf mitt væri án þess í dag, þetta er búið að vera svo mikið athvarf síðustu árin og mörgum af mínum bestu vinum kynntist ég þar. Ég setti mynd af mér á desktoppinn á tölvunni í kveðjuskyni, því ég er sannfærð um að mín verði saknað gífurlega. Starfslok mín væru samt mun dramatískari ef ég væri ekki að fara að vinna hinumegin við ganginn í vinkifjarlægð næstu þrjár vikurnar...

Save the last dance for me...

Aumingja köngulóin mín þarf að hafa fyrir lífinu í vindinum í kvöld, ríghélt sér alveg í vefinn sinn þegar ég kom heim. Ég hefði boðið henni inn í lognið og hlýjuna, en ég er hrædd við hana. Samt er mér alls ekki sama um örlög hennar, við erum nú einu sinni sambýliskonur og búnar að vera í allt sumar, ég vona að hún spjari sig í nótt. Og ég vona að hún sé búin að fyrirgefa mér það að hafa slitið eitt lítið band af vefnum hennar um daginn (sem var komið þvert yfir miðja hurðagættina mína, en hélt greinina heila klabbinu saman því vefurinn hennar rúllaðist upp eins og rúllugardína þegar ég sleit hann).
Ég er sykurpúði í kvöld.

8 rue des Bouchers

Nú fer þetta blogg mitt senn að breytast í útlandablogg, sem er eins gott því það er alveg að deyja hérna heima. Ég var loksins að fá vilyrði fyrir íbúð áðan, með tveimur frönskum stelpum sem heita báðar Mathilde... Samkvæmt lýsingunni er íbúðin sæt og fín, nýuppgerð, í miðbænum og stutt frá skólanum, með adsl og þvottavél og öllu. Hljómar kannski aaaðeins of gott til að vera satt en það verður bara að koma í ljós. Þær eru voða krúttlegar eitthvað og áhugasamar um allt sem er íslenskt, tónlist og tungumál og alltsaman, svo kannski get ég fengið þær til að kenna mér frönsku í skiptum fyrir íslenska menningarfræðslu. En þær skilja allavega ensku (og reyndar frönsku, þýsku, portúgölsku og ítölsku!) og hvað getur maður beðið um meira?? Og þá slepp ég við að leigja appelsínugula herbergið af önuga manninum sem svarar aldrei því sem ég spyr um heldur einhverju allt öðru. Injófeis önugi maður.

Já, þúsund sinnum já, þó þú sért plebbi!

Ég kom víst í Brúðkaupsþættinum já í gær, mér til einstakrar gleði. Nú þarf ég aldrei að gifta mig. Finnst skemmtilegur femínismi í því að vera karllaus í brúðkaupsþætti. En þá er ég kannski að grípa í strá... Þeir klipptu samt skilst mér út fínu litlu ræðurnar mínar tvær sem ég var látin halda af miklum gervihressleika. Ég er að íhuga málsókn.
Annars er ég bara kvefuð og málhölt í samræmi við það.

Í hverju ertu?

Ég vona að það séu ekki allir búnir að gleyma í blíðunni að fara daglega inn á www.thehungersite.com og klikka á stóra gula takkann til að láta auglýsendurna gefa smá mat, og nota svo flettispjöldin efst til að fara á systursíðurnar fimm til að gera það sama. Ég var búin að gleyma því nefnilega, mundi bara eftir síðunum í gær, en nú eru þær orðnar að sértakka á netinu mínu svo ég gleymi þeim ekki aftur. Fyrr en bráðum...
Foreldrar mínir ætla svo að ættleiða ABC-barnið mitt á meðan ég er úti, og það væri nú skemmtilegt ef þið tækjuð að ykkur að styrkja nokkra vini handa honum á meðan ég er í burtu. Svo hann sakni mín ekki þið vitið.
Annars hófst vinnudagurinn minn í dag kl. 8 í morgun og stendur til 12 í kvöld, með smá hléi til að skjótast aðeins til Evu fjöltyngdu sem ætlar að vera svo indælis indæl að hringja fyrir mig til Frans í einhvern gaur sem vill kaaannski leigja mér herbergi. Ég ætla að reyna að fá hana til að borða smá krít fyrst svo hún hljómi eins og stúlkugeiturnar á Rauða torginu (og úlfurinn í grísunum þrem...) en hún veit það ekki ennþá. Annars er ég við það að hætta bara við þetta alltsaman, ég á eftir að sakna allra svo hræðilega mikið. Af hverju verða allir svona hrikalega skemmtilegir og sniðugir rétt áður en maður flytur úr landi? Og hvað á ég eiginlega að gera ÁN KATTARINS???

Þeir brúnkast seint sem veðurguðirnir hata

Ekki að ég ætli að vera með einhver leiðindi hérna, en ER VERIÐ AÐ GRÍNAST Í MÉR??? Nú er búið að vera slagveður í tvo mánuði, svo í gær er mér sagt að forðast sól í mánuð og voilá! SÓL! Argh!
Ég ætla í dag að ganga um í flíspeysu, ullarsokkum og snjóbrettabuxum með vettlinga, eyrnaband (hvenær ætli þau komist í tísku aftur?) og glamrandi tennur og þykjast ekki sjá þennan bannsetta gula bolta sem aldrei getur gert eins og ég bið hann. Hrmph. (Og skriðtækla alla sem labba framhjá búðinni minn í dag a) á leiðinni í laugina, b) með ís eða c) með sólgleraugu).

Dr. Bónus

Ég held að læknar þessa lands séu búnir að rotta sig saman um það að vanrukka mig. Sem er auðvitað ekkert nema dásamlegt! Fór til tannlæknis um daginn sem tók myndir og krukkaði og potaði og rukkaði mig svo um fimmtánhundruð krónur, og í dag fór ég til sérfræðings sem rukkaði mig um tvöogfimm. Alveg hélt ég að það væri dýrara en þetta að vera lasinpési! Og í báðum tilfellum fékk ég bót meina minna, engar fýluferðir fyrir útsöluprísinn. Er kannski bara svona ódýrt að fara til lækna...?
Í gærkvöldi fórum við listamaðurinn í baðstofuslökun, og ég er ennþá svo slök að ég get ekki bloggað. Ég er franskbrauð í dag.

Skrúbbarnir

Í gær keypti ég mér Skrúbbaseríu og horfði á alveg helminginn af henni í einu með frönskum texta sem ég las samviskusamlega. Og það hjálpaði alveg helling! Enn ein ástæða til að elska Skrúbbana.
Annars eru fréttir núll eins og er, bara rigning og ég að vinna. Enda ekkert betra að gera í svona veðri. Get samt ekki sagt að vinnustaðurinn sé leiðinlegur sama dag og ég mæti svíni í grænum smekkbuxum á línuskautum um leið og ég dragnaðist inn í húsið hálfsofandi í morgun. Merkilega nokk þá var það með allar mögulegar hlífar, svo svín eru greinilega mjög öryggismeðvituð. Það eru ný vísindi fyrir mér.

Why don´t they liiiiiiiike me??? snökt...

Af hverju af hverju af hverju vill fólk ekki leigja með mér??? Veit það ekki hvað ég er fáránlega skemmtileg? Og sæt? Hvað þarf maður eiginlega að gera til að fá leigða íbúð í Frans?? Ekki það að ég veit alveg hvað maður þarf að gera. Maður þarf að svara auglýsingunum á frönsku. Ég get bara ekki fengið það af mér að skrifa einhverjum tölvupóst sem ég veit að er bæði fáránlega málfræðilega vitlaus og vitlaust stafsettur því ég er ekki með franska stafi. Ég er málfræðifasisti og get það bara ekki! Alveg nógu mikið álag að skrifa þessar tvær línur í minni eigin auglýsingu á frönsku... Í dag ætla ég samt að skrá mig (loksins) í Alliance Francaise og fá lánaðar franskar og ó svo menningarlegar myndir (man að síðast þegar ég fór sá ég eina um talandi hund, ætli hún sé ennþá til?) og halda svo mína eigin frönsku kvikmyndahátið (fyrst Háskólabíó þarf endilega alltaf að halda sínar akkúrat þegar ég er í prófum). Allir velkomnir, en alpahúfur og baguette eru sérstaklega velkomin.
"Þú verður að fylgja hjarta þínu. Mitt er hér í Sýrakúsu en þitt siglir burt"

Lífið á brúninni

Það er mjög heilsusamlegt að búa í miðbænum. Ég er meira að segja farin að stunda áhættuíþrótt í fyrsta skipti á ævinni. Nýja áhugamálið mitt: Extreme pisserí. Baðherbergið mitt er FULLT af kirkjugarðsskordýrum, svo klósettferðir á mínum bæ fá hjartað til að slá hraðar og adrenalínið til að streyma, fyrir utan að leiða mann til að iðka nokkrar klassískari íþróttir í bland. Til dæmis í gær sat ég á klóinu og var mikið að fylgjast með bjöllunni sem sat á veggnum fyrir framan mig og leit út fyrir að vera pínu drukkin (kannski komist í smá ilmvatn?) þegar Speedo Gonzales (RISA-könguló sem ferðast (get svo svarið það) á hraða ljóssins, nefndur eftir sundskýlu þar sem Speedy var þegar frátekið fyrir litlu köngulóna sem ferðast (get svo svarið það) á hraða ljóssing og býr í herberginu mínu) birtist á fleygiferð í áttina til mín. Ég tók með það sama þokkafullt grindahlaup yfir klósettið og svo þrístökk fram í stofu, þar sem ég hljóp 400 metrana með frjálsri aðferð og veini. Og af hverju í ósköpunum get ég ekki drepið skordýr??? Hvað er eiginlega að mér? Þau eiga bara eftir að halda áfram að safnast heim til mín þar til ég fæ taugaáfall, enda ekkert sem truflar þau þar og nóg af ilmvatni fyrir þau að rónast langt fram á haust!

Sunnudagsmorgunn í tómri líkamsræktarstöð

Af hverju tekst mér alltaf að djamma á vinnuhelgunum mínum og vera róleg fríhelgarnar? Sem betur fer vinn ég á stað þar sem enginn þarf að sjá hvað ég er mygluð. Hóst.
Ég er búin að senda póst á um það bil alla 99 sem eru að leita að meðleigjendum í Strasbourg á þessarri síðu en enginn vill mig. Af hverju vill mig enginn??? Ég reyki ekki, bít ekki og er kassavön! Það er meira en hægt er að segja um flesta Frakka ef orðið á götunni er rétt. Er farin að spá í að láta mynd af Unni Birnu fylgja með auglýsingunni minni, kannski hjálpar það...
Í Mogganum í dag er talað um 9 ára barn sem var að fæða barn í S-Ameríku, og það er "óttast að um nauðgun hafi verið að ræða". Vill einhver útskýra fyrir mér hver hinn möguleikinn er!

Fair warning:

Ætli það sé samkvæmisdansmenning í Strass? Kannski get ég spilað útlendingaspilinu til að fá einhvern til að dansa við mig... Er alveg sjúk, mig laaangar svo að byrja aftur að dansa, pirrandi að vera ástfangin af íþrótt sem maður er fullkomlega upp á einhvern annan kominn um að geta stundað. Ég vil vera mín eigin lipurtá, kann ekki við að vera háð einhverju taktlausu strákgerpi í dillinu, en gallinn er sá að það er skemmtilegi hlutinn. Að dansa við einhvern. Er búin að fullnægja þörfinni að hluta til með einhverju sóló-legghlífahoppi í mörg ár en nú er nóg komið, og mér skal takast að fá eitthvað aumingjans Frakkagrey til að dansa pínu foxtrott eða vals eða bara fugladans þó það verði mitt síðasta! Mark my words! Einhver ætti nú samt að vara Frakkana við, það er ekki nema sanngjarnt að þeir fái tækifæri til að verja sig...

Útilegu-Unnur, fæst núna með gæsahúð

Helgin var algjörlega æðisleg, þrátt fyrir að ég sé einni nögl fátækari að henni lokinni (vinstri miðtásunögl: Sakna þín beibí!). Ég elti Bylgju mína á Vindheimamela á landsmót hestamanna, þar sem hún komst í ÚRSLIT! Til hamingju elsku Bylgjukrútt :* Ég er að vísu alger bjáni þegar kemur að þessum hestabisness svo ég sat bara í brekkunni, fast vafin inn í fullt af teppum eins og frönsk pulsa, og horfði stóreyg á allt sem var að gerast. Rembdist við að læra að þekkja gangtegundirnar og það tókst svona að mestu leyti, spurði heimskulegra spurninga við öll tækifæri og vældi og skældi yfir því hvað það væri agalega gasalega kalt í tjaldinu mínu (það voru í alvöru hitaskil sem gengu í gegnum mitt tjaldið, Bylgja var grilluð öðru megin meðan ég lá skjálfandi hinumegin knúsandi hundinn mér til hlýju. Takk Iða.). Fjölskyldan hennar Bylgju ættleiddi mig (nauðug viljug), fóðraði mig á grillmat (namm) og vafði mig inn í teppi þegar ég var farin að blána í brekkunni. Ég kynntist fullt af skemmtilegu fólki og var sagt að ég væri "dönnuð", sem segir kannski mest um félagsskapinn sem ég var í.

Besta augnablik ferðarinnar: Liggja og lúra í brekkunni undir teppi og hlusta á rigninguna. Íslensk sumur eru svo yndisleg!! Ég er öll alveg flöffí af gleði yfir þessu öllu saman :)

IKEA-væðing

Við Ása skelltum okkur í IKEA í gær því enginn má flytja að heiman án viðkomu þar. Við fundum allt sem mig vantaði og fullt sem mig vantaði ekki en keypti samt, en hinsvegar fannst ekkert sem Ásu vantaði. Misjafnt mannanna lán og allt það. Hér kemur allavega alveg ótrúlega smáborgaraleg og döll vörutalning: Ég keypti mér:

Ofsa fína og marglita kertastjaka

Lampa (en enga peru...)

Diska og skálar (diska upp á sportið og skálar undir haaafragraut)

Meira að segja bjórglös! (undir bjór...)

Einnig keypt en ekki myndað: Sængurföt, lak, skurðarbretti, hnífur, þvottaklemmur og herðatré. Uppgötvaði líka að ég er vatnsglasasnobbari, engin vatnsglös í IKEA voru nógu góð fyrir mig, er hinsvegar búin að finna þau í Duka í Kringlunni og ætla að kaupa þau á morgun. Ég á allskonar dótarí! Jei!
Þessi færsla var bara fyrir mömmu held ég, allir hinir verða bara að afsaka þessa hrösun í ruglið.

Lady Marmalade til bjargar

Ég geri mér grein fyrir því að ég er enginn ofur-bloggari. Og ég sætti mig við það. Amen.
Mér er held ég að verða búið að takast að senda þeim í Strasbourg um það bil allt sem þeir vilja fá frá mér til að ég teljist góður og gildur nemandi hjá þeim næsta vetur, þar á meðal mynd af mér (þar sem ég er 19 ára og fannst zoolander töff), nöfn og númer á kúrsunum sem ég vil fara í (sem mér var sagt að væri mjög nauðsynlegt þangað til ég sendi þeim það og var þá sagt að listinn sem þeir sendu mér væri úreltur og ég þyrfti ekki að velja kúrsa fyrr en ég kæmi út), blóðprufu, fingraför og hár úr hala mínum. Nákvæmir þarna í Frans. Það eina sem allir vara mig alltaf við sem hafa reynslu af svæðinu er að það sé alveg hræðilega ofsalega kalt þarna á veturna, svo ég er farin að hamstra hlífðarföt að góðra íkorna sið. Ef einhver á föðurland sem hann vill losna við þá er ég að leita. Vitið þið hvað föðurlönd kosta??? Þetta er glæpur. Ég hinsvegar get ekki sofið hérna heima á veturna fyrir kulda, og þar sem húsin þarna úti eru mun verr upphituð og kuldinn rakari þá býst ég við því að þurfa annaðhvort að klæða mig í heimskautsfaragallann fyrir svefninn eða fá einhvert Frakkagrey til að hita bólið mitt fyrir mig. Það vill svo heppilega til að eina setningin sem ég er með á kristaltæru í frönskunni er einmitt "voulez-vous couchez avec moi ce soir?" svo það ætti alveg að reddast.

Fitness dúett

Ég trúi því ekki að ég hafi í síðasta fréttapistli gleymt að minnast á heilsuátak Unnsu og Gunnsa. Nú þegar ég er á leið til Frakklands og Gunnar Helgi orðinn löggildur listamaður með gráðu og allt (jei Gunni!) þá var ekki um annað að ræða en að flikka aðeins upp á lúkkið, svona fyrir allar Séð og Heyrt myndatökurnar hans og myndatökur frönsku aðdáandanna minna. Svo við fengum einkaþjálfaranema til að taka okkur í gegn ókeypis, því við erum svo hagsýn, og erum á góðri leið með að breytast í fyrirmyndirnar okkar, Barbí og Ken. Vandræðalegt samt um daginn þegar við vorum saman á æfingu og ætluðum í sund á eftir en týndum hvoru öðru í gímaldinu sem er kallað Laugar og eftir að hafa ráfað um húsið heillengi og leitað þá fórum við bæði í sund, á sama tíma í sömu laug, en hittumst ekki. Þetta. Hús. Er. Of. Stórt.

Naglasúpa

Smá bloggleti að hrjá mig þessa dagana, enda ýmislegt búið að vera að gerast. Ég er flutt í 101 og það er nú meiri hamingjan, hjólaði meira að segja í vinnuna í morgun og það hef ég ekki getað gert síðan ég var að vinna á Hlein! Nú er reyndar hafin alveg æðislega leiðinleg vinnuhelgi, þarf meira að segja að vinna af mér Kvennahlaupið, sem mér finnst skítt í meira lagi. En ég verð víst ennþá kona í næstu viku og hleyp þá bara mitt eigið kvennahlaup í blíðunni sem ég er búin að panta. Eini gallinn sem ég sé á nýjum híbýlum mínum er að ég bý alveg upp við kirkjugarðinn og pöddulífið þar er bæði fjölskrúðugt og að því er virðist félagslynt. Silfuskotturnar á baðherberginu halda stundum samkomur með maurum og köngulóm og einhvers konar bjöllum, og þá vantar mig einhvern til að fjarlægja samkomugesti og flysja mig niður úr loftinu þar sem ég hangi stjörf á klónum. Býður sig einhver fram?
Um síðustu helgi kvaddi ég gæludýrin og skellti mér í sveitina með Árna frænda. Ég var búin að gleyma því hvað kindur eru skemmtilegar, en náði að rifja upp nokkra gamla takta í fjárhúsunum og skemmti mér konunglega. Fór líka í heimsóknir á Þórshöfn, í Sel að kíkja aðeins á varpið og í messu með ömmu minni. Á leiðinni aftur í bæinn komum við svo við hjá karli föður mínum á Akureyri, og þáðum tebolla í nýju, fínu íbúðinni hans. Var allt í allt bara frábær ferð og ég þakka frændanum hérmeð kærlega vel fyrir mig!
Skólinn í Strasbourg er búinn að senda mér vilyrði fyrir skólavist þar næsta vetur, sem er mjög gott nema það er allt fullt á skólagörðunum þeirra, sem þýðir að ég þarf að leigja mér húsnæði þar blint á almenna markaðnum. Hjálp! Ég á eftir að búa í frönskum skókassa. Ég er ferlega glöð að hafa ekki skráð mig í meiri vinnu í sumar því nú hef ég þrjá mánuði til að verða mellufær í frönsku, og líkurnar á að það takist eru hverfandi miðað við hversu lítið mér tókst að læra þessi 5 ár af gagnfræða- og menntaskólafrönsku. Gæti ekki einu sinni pantað mér kaffi í Frakklandi eins og er. Öll hjálp vel þegin.
Oh, ekki hægt að blogga skemmtilega eftir svona langt hlé, þá eru bara fréttatilkynningar.

Ættfræðipistill

Allir sem voru í Gaggó Mos á svipuðum tíma og ég skilja sjokkið sem ég fékk þegar ég komst að því að ég ætti að leika Ragnheiði Ríkharðsdóttur fyrir framan Ragnheiði Ríkharðsdóttur í gærkvöldi. Ég fór næstum að gráta því ég vissi bara að næst þegar við yrðum kölluð á sal væri það ég sem þyrfti að standa upp og játa syndir mínar undir þrumuraust hennar. Úff. Fyrir utan það að samkvæmið sem slíkt, sjálfstæðismannahátíð, hræddi mig meira en orð fá lýst. En ég fékk að svara "Komstu keyrandi?" með "Nei, við í flokknum megum ekki keyra meira fyrr en eftir kosningar" og það fannst mér allavega pínu skemmtilegt. Aumingja, aumingja Eyþór Arnalds.
En það sem gerðist merkilegra í gær var að ég fékk að gæsa mömmu mína, sem alls ekki allir fá að gera í lífinu. Það var líka ofsa gaman, ég var reyndar meira svona konan á bak við tjöldin heldur en aksjúal þátttakandi en það finnst mér bara næstum skemmtilegra. Ég hendi inn myndum um leið og ég fæ þær. Mamma verður vonandi búin að fyrirgefa mér í brúðkaupinu á morgun því annars er ég hrædd um að hún felli mig eða eitthvað þegar ég geng með hana inn kirkjugólfið til að gefa hana. Sem ég geri algerlega nauðug viljug því mig langar ekkert að gefa neinum hana mömmu mína. Bara alls ekki. Hef líka ákveðið að kalla þetta lán. Ég er að lána hana, með ströngum skilyrðum. En það skemmtilega við þessi lánaviðskipti er að ég gegni þar hlutverki pabba hennar, sem ætti hefðinni samkvæmt að lána/gefa hana en kemst ekki, og þannig er ég, eins og Laddi, orðin afi minn. Ég er afi minn, lalalala...
Brúðkaup á morgun. Úff. Best að hætta að blogga og halda áfram að skrifa ritgerð, eins gott að nýta þessar sjaldgæfu stundir sem ég er ekki að brúðkaupast til að halda áfram með þetta síðasta verkefni annarinnar. Ef einhver vill einhverntímann giftast mér þá má hann plís ráða öllu og gera allt. Ég mæti bara. Heyrirðu það skan? Knock yourself out.

Reykjalundarfjör

Nú er próflestur fyrir öryggi og samvinnu í alþjóðakerfinu á byrjunar- og lokastigi, sem er mjög algengt ástand í mínu námi. Er að fá massaprófkvíða og svona, sem kemur ekki á óvart því ég fékk næstum taugaáfall síðast þegar ég tók próf hjá þessum kennara, reytti hár mitt og skegg og fleygði blöðum um allt. Mamma þurfti að taka mig á sálfræðinni til að fá mig til að mæta í prófið yfirleitt, og mér sýnist stefna í það sama núna. (Mamma mín, plís komdu heim í hádeginu á morgun, það þarf einhver að bjarga hárinu mínu, rífa blöðin úr stirðnunum lúkunum á mér og henda mér út með penna, bíllykla og magic!). Eftir það er líka bara eitt próf eftir, og á föstudaginn verður þetta prófvesen búið. Þrítugsafmæli mætir próflokadjammi það kvöld, jeeeiii! Svo er það bara að rumpa af einu stykki 20 bls. ritgerð og þá er þessarri önn samviskuseminnar (hóst) lokið!!!
Í deiglunni er það hinsvegar helst að foreldrar mínir tilkynntu það í byrjun vikunnar að þau ætla að gifta sig 21. maí. Reyndar tilkynnti held ég Óli það aðallega að hann ætlaði að gifta sig, og bauð mömmu að taka þátt ef hún kærði sig um. Hefði verið gaman að sjá hverjum hann hefði gifst ef hún hefði ákveðið að taka ekki þátt, en það fáum við víst aldrei að vita. Gott samt að vita að ég er ekki ein í mínum valkvíða, mamma er búin að vera í ca. 18 ár að gera það upp við sig hvort það sé nokkuð vit í þessu sambandi. En það semsagt er það, og nú á að segja prestinum það. Og guði. En hann veit það nú líklega fyrir...

Miðbæjarrotta in the making

Um mánaðamótin flyt ég á Ásvallagötuna. Það er ótrúlega æðislegt, þó það sé bara yfir sumarið, enda veit ég ekkert hvort ég verð á landinu næsta vetur, ef ze grand masterplan gengur upp þá verð ég náttúrulega í Strasbourg. En í sumar mun ég semsagt hjóla útum allt, lesa á kaffihúsum og drekka alla daga því ég þarf ekki að borga handlegg og fótlegg fyrir leigubíl heim. Jei! Ég verð ekki að vinna einu sinni fulla vinnu, ólíkt síðasta sumri þegar ég vann 315% vinnu allt sumarið, svo ég býst meira að segja við því að sleppa frá þessu sumri sæmilega heil á geði. Nú er bara að klára prófin, klára ritgerðina og flytja svo lögheimilið í Laugardalslaugina. Eða á Ásvallagötuna.
Vill svo einhver segja mér af hverju það er í lagi að flytja inn fullt af vændiskonum til að "þjónusta" alla gröðu, sveittu fótboltaaðdáendurna í Þýskalandi? Ég veit að Hannes Hólmsteinn segir að aumingja stelpurnar sem eru sætar en ekkert voða klárar verði að fá að vinna fyrir sér einhvern veginn en hærregud, það er eitthvað mjög rangt við þetta alltsaman. Er ekki bjór og fóbó hvort eð er meira stuð en skipulagt kynbundið ofbeldi og fóbó? Og ef það er svona svakalegt aftöppunarvandamál í gangi væri þá ekki sniðugra að láta alla gröðu, sveittu fótboltaaðdáendurna bara hafa túbu af handáburði og klósettrúllu við komuna á HM?

Stríð vs. próf

Próftarnir eru líkar stríði að því leyti að mitt í öllum viðbjóðnum eru oft gerðar merkilegar uppgötvanir. Dánartíðnin er hinsvegar töluvert hærri í stríðum, en þá er andlegur dauði ekki talinn með auðvitað. Uppgötvun vorprófa 2006 er: BSÍ kaffi!!! Það er kleinubragð af því! Er hægt að biðja um eitthvað meira, fyrir utan hvað það er skemmtilega þjóðlegt? Ég er orðin algerlega háð því, fékk ekkert í gær og endaði í titrandi fráhvarfi, og þá kom nú hin fíknin mín sér vel: XA radíó 88,5. Jább, ég er orðin gjörsamlega háð útvarpsstöð AA-samtakanna, sem kom mér í gegnum mesta fráhvarfið í bílnum á leiðinni heim úr skólanum í gær. Ég viðurkenndi með tárin í augunum að BSÍ kaffi hefur þau áhrif á mig að það breytir því hvernig ég upplifi heiminn, ég er valdalaus gagnvart því og er núna að vinna í listanum mínum yfir þá sem ég þarf að biðja afsökunar á því að hafa traðkað á þeim á leið minni á BSÍ. Batnandi fólki er víst best að lifa...
PS. Mömmu minni finnst þessi húmor ekki sniðugur. Fyrirgefðu mamma mín, ég er að reyna að hætta...

Hressleikinn at 02:30

Hér er lítil mynd sem sýnir hressleikastuðulinn núna þegar klukkan er að nálgast alltofmargt, Eva og Hildur, voilá (Eva vill að þið vitið að stundum er hún töluvert sæt. Ekki núna, en stundum):
Í gær var lokaslútt í leikhúsinu og ekki mikið sofið í kjölfarið. Í dag er búið að ræða kenningar í stjórnmálafræði út í eitt og ég held að lífsviljinn minn sé að verða horfinn. Skál.

Úpsí.

Ég er soddan kjánaprik. Hlekkurinn á myndirnar er vettlingur.myphotoalbum.com. Var að klúðra. Skjús mí.

Myndir

Var trufluð í gær og setti myndirnar ekki inn en nú eru þær komnar með útskýringum og alles á myphotoalbum.com/vettlingur. Lofa.
Svo sýnist mér verða lokasýning á "Í beinni" á laugardaginn og ég má bjóða vinum og vandamönnum, svo ef einhver hefur áhuga á að kíkja þá bara henda á mig smsi.

Örferðalagið til Köben var ofsa skemmtilegt alveg. Ótrúlega gaman að hitta loksins hana Hrefnu mína líka! Gleymdist samt að ná mynd af henni... Nenni annars ekki að skrifa um ferðina, svo hér kemur bara smá myndasería úr henni (þemað er ÉG því þetta er MÍN síða), og restina af myndunum má sjá á www.myphotoalbum.com/vettlingur. Gjössovel.

Ég er ekki fersk fyrir sjö á morgnana:
Aðrir hinsvegar eru það. Svei þeim:


Verandi frá World Class var ekkert borðað nema gras og prótein alla ferðina:

Laufey er alltaf jafn svöl á því:

Við Jóga deildum herbergi og rúmi. Mjög kósý og rómó:
Hrafnhildur var kosin ungfrú World Class:

Sigurpáll þótti hafa best skapaða stélið og Benni fegursta kroppinn. Þeir fundu hjá sér þörf til að staðfesta þá kosningu. Spes:

Arna getur hoppað hæð sína í fullum herklæðum, alveg eins og Gunnar heitinn. Gunnar átti samt líklega ekki svona fínar nærjur:

Ég nennti ekki að vera með myndavél á mér í ferðinni, þetta eru allt myndirnar hennar Láru, sem ég ætla að giftast þegar ég verð stór:

Öðruvísi eins

Þegar ég var 10 ára og að flytja í nýtt hús með foreldrum mínum þá heyrði ég þau einn daginn ræða það hvernig grindverk þau langaði að setja í kringum nýja garðinn okkar, eitthvað víravirki með grjóthnullungum minnir mig. Þar sem ljósin okkar voru þegar úr bremsurörum úr bíl og gólfið handmálað af íbúunum í allskonar undarlegum mynstrum þá fannst mér nóg komið af undarlegheitunum, fór að skæla og spurði foreldra mína hvort við gætum aldrei gert neitt eins og venjulegt fólk bara, hvort allt þyrfti alltaf að vera skrýtið. Það held ég samt að sé í eina skiptið sem mér hefur gramist það að foreldrar mínir skulu hafa húmor fyrir því sem er öðruvísi og óhefðbundið. Ég fór að hugsa um það um daginn hvað ég er heppin að hafa alist upp við það viðhorf að það sem er framandi og öðruvísi en ég þekki það sé spennandi og áhugavert en ekki rangt og hættulegt. Ég hef nefnilega á tilfinningunni að það hafi gefið mér töluvert meira umburðarlyndi gagnvart heiminum en ég hefði annars haft, og hæfileikann til að geta allavega stundum munað að það séu tvær hliðar á málunum og mín reynsla og skoðun á hlutunum sé ekki endilega sú eina rétta. Og ég er þakklát fyrir það. Annars kynni ég sennilega ekki að meta nýju, skrýtnu sokkana mína:

Kóngsins Kaupmannahöfn

Í fyrramálið skýst ég af stað til Köben og verð þar heilar tvær nætur ásamt 129 misfullum vinnufélögum og karókítæki. Og ég ætla að hitta Hrefnu og Siggu og Báru og Gyðu og alla hina sem ég er að gleyma en búa líka í Köben, og ég ætla í rússíbanann og kaupa skó á litla brósa og borða góðan mat og drekka Tuborg Classic og valhoppa og taka myndir.
Um næstu helgi verð ég hinsvegar með eyrnatappa í báðum að lesa fyrir próf á Hvammstanga, þar sem ég var gjössovel skikkuð í leikferð og þarf að koma fram sem Díana Sovjana Cristina Jensen í sirka bát 10 mínútur á laugardagskvöldinu. Díana hefur líka verið bókuð sem skemmtiatriði á einkasamkvæmi í bænum helgina þar á eftir. Alter-egóið mitt er vinsælla en ég, sem er ósköp sorglegt... Unnur sjálf er líka fín stelpa og velkomið að bjóða henni í samkvæmi af öllum toga. Díana smíana. Piff. Skal koma með mitt eigið handklæði og allt.
Og síðast en ekki síst: GLEÐILEGT SUMAR!!! Megum við öll sameinast um að skella treflum, húfum, vettlingum og ullarsokkum á farfuglana þegar þeir koma heim.

Móðurástin

Þeir sem þekkja mig vita að mér finnst næstum ekkert í heiminum sætara en nýfæddir merðir, aðallega af því þeir eru með litlar, bleikar og krumpaðar bumbur eins og þessi hér:
Svo var ég á netinu að væflast áðan og rakst á þessar patta hér, og nú langar mig í grísling!!!:
Ég er sökker fyrir ljótum dýrum er mér sagt... Lái mér hver sem vill.

Brussel - rest

Brjálað að gera á öllum vígstöðvum og mér er sagt að klára ferðasöguna? Nú jæja, hér er short version:
Dagur 4: Fórum í SHAPE herstöðina í mjög skemmtilegan fyrirlestur og panel spurningasessjón með þremur sæmilega háttsettum dúddum, sem svöruðu fyndið og gáfu Evu penna með útvarpi í fyrir að koma með bestu spurninguna og Hauki fyrir að vera mesta nördið. (Hversu oft á ævinni mun NATO hershöfðingi í fullum skrúða segja við þig: "Get a life"? Magnað!). Þaðan fórum við með krúttlegt nesti frá NATO í poka (hvað er lúðalegra en að standa innan um alla hermennina í SHAPE með samloku og epli í plastpoka?) og héldum í Ráðherraráð ESB. Þar tók á móti okkur hress (og pínu fullur) ítalskur eðlisfræðingur sem talar 10 tungumál og fær hiklaust verðlaunin fyrir skemmtilegasta fyrirlesturinn. Ætlaði að taka hann með heim en hann muldraði eitthvað um fjölskyldu, ólaunað leyfi og kjarasamninga og stakk af. Um kvöldið lenti ég svo saklaus í djammi, og vil ég hér með kenna Gulla algerlega um það því eftir að hann fór að panta Jagermeister í liðið varð ekki aftur snúið. Og það var þá sem ég var uppgötvuð krakkar mínir! Heldur betur, var bara að dansa salsa við Írana þegar það vatt sér að okkur maður sem sagðist vera salsakennari og að ég væri með gífurlega öfluga, náttúrulega hæfileika á sviði salsa! Léleg pikköpplína? Nehei, guðdómlegir hæfileikar. Er að íhuga að flytja suður á bóginn og deila fimi minni með salsaveröldinni, en vil nú ekki skyggja á þá sem hafa eytt mörgum árum í að æfa þetta. Svona er maður nú hógvær.
Dagur 5: Skunduðum af stað í íslenska sendiráðið þar sem við sátum örugglega 5 fyrirlestra um þjónustutilskipunina, starfsemi sendiráðsins, Schengen og fleira sniðugt. Ónefndur aðili krotaði fýlukarla á dagskrána sína sem hann svo sýndi einum fyrirlesaranna, og var í kjölfarið í snatri sendur aftur á kisudeildina á Sunnuborg þar sem hann átti að rifja upp nokkur grundvallaratriði. Við hin fengum að fara í kokteilboð í sendiráðinu þar sem við átum og drukkum og vorum glöð. Hluti hópsins fór aftur að dansa salsa um kvöldið en ég borðaði bara ís og fór heim að lúlla, enda búin að ná toppnum í salsadeildinni og ekki mikið meira fyrir mig að gera þar.
Dagur 6: Byrjuðum í EFTA og fórum þaðan yfir í ESA, allt mjög ánægjulegt, og enduðum daginn í Evrópuþinginu þar sem við gengum óvart inn á trúnaðarfund í þingsalnum og fengum ýmsar skýrar og frekar dónalegar handabendingar að launum. Á endanum fengum við að setjast inn í þingsalinn og hlusta á fundinn, sem var algjörlega ótrúlega æðislegt!!! Þetta var líka augnablikið sem margir (þar á meðal undirrituð sjálf) gerðu sér grein fyrir hversu mikil nörd við raunverulega erum. Um kvöldið fór fólk eitthvað að sukka en við Eva vorum komnar með algerlega nóg af áfengi og látum svo við fórum bara í joggaranum í bíó, þar sem við sátum steinþegjandi í tvo tíma og horfðum á Capote. Mjööög þægilegt.
Dagur 7: Allt í steik í Brussel því það var leiðtogafundur, urðum þess vegna að labba endalausa króka í kringum gaddavír, brynvarða bíla og FBI menn (í Evrópu? Skil ekki...) til að komast loksins í Framkvæmdastjórn ESB. Þar sátum við ótrúlega gagnslausan fyrirlestur um allskonar sem við vissum öll fyrir, og vorum fegin að sleppa út í kaosið aftur að honum loknum. Þá var farið að versla og vesenast, skelltum okkur í kínverskan stórmarkað og fundum mat sem var bragð af, í fyrsta skipti í ferðinni. Þegar hópurinn var að missa sig í hinum stórhættulega drykkjuleika "ég hef aldrei" stungum við nokkur af og fórum heim að pakka.
Dagur 8: Hrúguðumst sybbin út í rútu sem reyndist bensínlaus. Hrúguðumst út úr henni og inn í aðra. Eftir um það bil eins og hálfs tíma ferð fórum við að sjá ferðatöskur svífa framhjá gluggunum og lenda í mykjunni í vegarkantinum. Þá hafði farangurshólfið opnast og við þustum út að hlaupa á eftir töskum um allt. Eftir þann skemmtilega ratleik vorum við allavega öll vöknuð. Við löbbuðum svo inn á Schipholl lyktandi eins og bændaskólinn á Hvanneyri. Og svo flugum við heim. Jei!
Myndirnar mínar eru hræðilegar því ég nennti aldrei að hafa myndavél á mér, en þær eru samt á vettlingur.myphotoalbum.com. Það er örugglega dónalegt að benda á annarra myndasíður en Eva er með betri myndir á aldingardurinn.myphotoalbum.com.
Langilangi póstur.

Brussel - dagur 3

Ég er búin að vera að bíða með restina af ferðasögunni þar til ég fengi myndir frá hinum í ferðinni því ég var svo ódugleg að taka þær sjálf, en það virðist ætla að dragast og ég vil punkta þetta niður fyrir sjálfa mig áður en ég gleymi alveg hvað gekk á. Svo engar almennilegar myndir...
Dagur 3: Fyrsta heimsóknin okkar var í höfuðstöðvar NATO, sem komu á óvart aðallega fyrir lélegan arkitektúr. Þetta var eins og að keyra (eftir svaaakalegt öryggistékk í kuldanum) inn í austur-evrópska martröð. Seinna var okkur sagt að byggingarnar eru gamall geðspítali (sem útskýrir líklega gluggaleysið, bólstruðu veggina og spennitreyjurnar. Allt í lagi, gluggaleysið. Og litlu hárgreiðslustofuna)... Við löbbuðum í ferlega fínni, einfaldri röð, mjög óíslenskt, vegna þess að einhver fór að grínast með að það væru leyniskyttur á svæðinu sem plöffuðu niður þá sem ekki héldu sig snyrtilega í röðinni sinni. Við hlógum móðursýkislega og einbeittum okkur, fínni röð hef ég aldrei séð (enda var enginn skotinn á leiðinni).
Fyrsti fyrirlesarinn var bandarískur maður, mjög skemmtilegur en frekar lítið á honum að græða þar sem hann kom aðallega með staðlaðan kynningaráróður, borinn fram með perluhvítu brosi og bröndurum á réttum stöðum.
Næstur í röðinni var Tyrki sem hélt frábæran fyrirlestur um helstu aðgerðir NATO, sem ég gæti sagt meira frá ef ég hefði ekki verið að einbeita mér að því að kafna eins hljóðlega og ég gæti í eigin hósta. Ég dó næstum, en boj ó boj hvað ég hefði dáið hljóðlega. Svona er maður vel uppalinn.
Þá var komið hádegishlé, og af því túlkarnir eru með samning uppá einn og hálfan tíma í mat þá fara allir í svo langan mat með þeim, því ekki viljum við að NATO offiserar fari að misskilja hvern annan og allt fari í bál og brand yfir málfræðirugli meðan túlkarnir gúffa í sig einum af sex réttum sem voru í boði þennan daginn. Ég kaus pasta, sem var svo vel útilátið að þessi eini og hálfi tími nægði mér ekki til að klára það. Það sveltur enginn í NATO.
Við ultum aftur inn í gluggalausa salinn okkar til að heyra belgíska konu halda frábæran fyrirlestur um hlutverk NATO í baráttunni gegn hryðjuverkum. Ótrúlega merkilegt alltsaman.
Þá hinsvegar fór að syrta í álinn. Við marseruðum á fund íslensku sendinefndarinnar, með miklar væntingar eftir frábæra dagskrá. Það sem við fengum voru hinsvegar þrír menn sem hlógu að spurningunum okkar og svöruðu þeim með yfirlæti og áhugaleysi. Við vorum frekar svekkt þegar okkur var smalað þaðan út (og ég var pínu sjóveik því einn strákurinn í hópnum hristi á sér fótinn allan fundinn), en það entist ekki lengi því sendiherrann hafði boðið okkur heim til sín í kokteil og þau hjónin eru sko ekki sjabbí gestgjafar. Það var svoleiðis borið í okkur mat og drykk, (humarsúpan, naaaaaaaaaamm!) og þau hjónin spjölluðu við okkur um allt sem við gátum mögulega viljað vita með bros á vör. Við rúlluðum þaðan út (sumir vegna vínsins, aðrir vegna matarins...) sæl og glöð og sööödd. Við gerðum svo eitthvað meira um kvöldið en það getur ekki verið merkilegt þar sem ég man ekkert hvað það var. Enda pínu létt eftir allt vínsullið...